Proviand Restaurant

Proviand Restaurant, 'n pragtige gerestoureerde klipgebou in Griekwastad, bied aan reisigers op die N8 hoofroete tussen Kimberley en Upington 'n ware oase.089.jpg

Die eertydse Landdroswoning se karaktervolle styl skep 'n huislike gevoel waar besoekers waarlik tuis kan voel. Die Nasionale Gedenkwaardigheid is reeds in 1888 opgerig en is die oudste staatsgebou in Griekwastad.

Danksy die visie van Anton van Niekerk, huidige eienaar, kan reisigers sedert November 2011 by die smaakvol ingerigte restaurant aandoen op hulle reis. 

Die heerlike kaggelvuurtjie op die koue wintersoggende, maak nie net die koue voete, maar ook die harte warm.

In die somer kan besoekers heerlik buite in die tuin ontspan.

Die uniekheid van die restaurant is dat die geregte tuisgemaak en vars voorberei word. Besoekers kan te alle tye verseker wees van kos van hoogstaande gehalte. Moeite word gedoen om organies gekweekte groente en vleisprodukte en eiers van vrylopende diere in ons geregte te gebruik.

Die uitgebreide spyskaart sluit in heerlike ontbyte, tuisgebakte pasteie en croissants, heerlike steaks en verleidelike nageregte. Geregte is met sorg gekies om aan besoekers 'n positiewe ervaring te gee.

Vir die bestelling van wegneemetes skakel ons by 082 876 4956

Die vriendelike personeel is verbind tot uitmuntende diens!